مشنة سعيدة.. الحلقة( 15)

بقلم/ عاطف محمد

وأثناء فتح غرفة الباب فجأة ، وجد رسمية تسترق السمع ،فلما شاهدت بشرى ذلك اندفعت وأمسك بها، وظلت تكليل لها الضربات، وحاولت البنات وسعيدة تخليصها من يديها فلم يستطعن وذهبت محاولتهن سدى، وأصبحت المحاولات دون جدوى حتى صاح الحاج عبد الرحمن بقوة.......
خلاص سيبيها يابشرى (امتثل الجميع بما فيهم بشرى التى ابتعدت على مضض متبرمة
علشان خاطرك بس يا حاج عبد الرحمن
(عدلت رسمية من هيئتها وقالت بصوت باك )
بتتكتروا عليا وانا واحدة غلبانة
قال غلبانه قال ، حد جه جنبك ياعقربة ياوش البوم
ما قولنا خلاص يابشرى روحى لحالك يارسمية
طبعا هاروح لحالى ، بس هاعلمكم محضر الأول ، محضر تعدى على موظفة أثناء تأدية الخدمة
وهى الموظفة المحترمة تتجسس على الناس
مين قال لك إنى كنت باتجسس يا سعيدة
أمال كنتى بتعملى قهوة ورا الباب(قالها عرفة ساخرا)
خلاص خلصنا (امرا)روحى لحالك يا رسمية وبلاش فضايح(قالها الحاج عبد الرحمن ليفض الموقف)
الفضايح هاتحصلكم انتم لما اجرجركم فى حديد
شوف الولية قليلة الرباية، يابجحتك (تحاول التهجم عليها فتمنعها سعيدة)
علمونا ان البوم شؤم والتعلب مكار والديب غدار والغراب خراب ، وقالوا الحاجات دى فى الحيوانات بس ، ولما كبرنا لقينا الحاجات دى فى البشر مش فى الحيوانات
قصدك ايه يا بنت المدارس يامتعلمه
والنبى ومن نبا النبى لاعمل محضر ليكم كلكم،
انا رايحة النقطة دلوقتى (دخل الضابط سامح فى هذه اللحظة فخفق قلب صابرين )
والنقطة جت لحد عندك يا رسمية
ألحقنى يا باشا ضربوني وسحلونى وقطعوا هدمومى(شوف)(تنظر لها بشرى شزرا)
(تلكزها صابرين للكلام)يشوف ايه يامسهوكه
(يقول سامح بهدوء) وايه تانى؟
دى هى إللى....(أشار الضابط لبشرى بالسكوت)
كنت عايزه اعمل محضر يا باشا، محضر إعتداء على موظفة أثناء الخدمة
تمام وبالمرة نشوف مين إللى سرق المورفين من دولاب الصيدلية و إللى اتحقن بيه قاسم
(اصفر لونها)اكيد مش انا(ارتعش صوتها) حد يخون مكان أكل عيشه
عندك حق ومين إللى كان السبب فى موت أيمن(هنا صرخ الجميع) ايه!!!!!!!!
دخل الضابط حسام هادئا(قبل تطور الموقف)
انت لسه هاتتكلم يا سامح بيه خدها على البوكس
تمام يا حسام باشا(ألتف للشاويش حنفى) شاويش حنفى حط الكلبشات فى ايدها وخدها على البوكس
انا مش فاهمة حاجة (يظهر على وجهها الانزعاج)
كل هايبان يا ست سعيدة
حسام(تقولها مستنجده به)
أهدى يارضا كله هايبان ...... ماتقلقيش (انصرفت قوة الشرطة )وسط كلمات وتعليقات من هنا وهناك
فيه ايه؟
رسمية قبضوا عليها
تستاهل بس ليه؟
اكيد ربنا وقعها فى شر أعمالها
ربنا مابيسيبش
يلا فى داهيه
فيه ايه؟
ربنا يسترها على عبيده
ده ذنب سعيدة
ربنا بيخلص حق الساكت بأربع كلمات حسبى الله ونعم الوكيل
هى ايه الحكاية؟
رسمية قبضوا عليها متهمنها فى جريمة قتل وسرقة
وهى عملت كده
إللى زى رسمية تعمل أكتر من كده
هى الخسرانة
الخسارة مش انك تخسر حد حبيته
الخسارة انك تخسر نفسك ورسمية باعت نفسها للشيطان
شيطان ايه دى هى الشيطان نفسه
أصبح المكان يتجاذب موضوع رسمية بشماته
وصارت حكايتها على كل لسان سبحان الله كما تدين تدان
تحركت سيارة الشرطة إلى نقطة كفر العنب

_ حمدالله على السلامة يا أبطال (قالها الضابط المصاحب لفرج وادهم بود)
أنتم إللى أبطال يا افندم ، إللى عملتوه بطولة إنقاذكم لينا وفكرتكم أننا نخرج بشكل أمن وتوصيلنا لمصر
ربنا يخليكم لمصر
ربنا يحفظكم أنتم لمصر، أنتم أمانة فى رقبتها
واحنا دورنا نحمى ولاد مصر و بنعتبر نفسنا شهداء تحت الطلب
شكرا يا افندم ،جميل ان الانسان يموت علشان وطنه ،بس الاجمل انه يعيش علشان وطنه ، مش حب فى الحياة لكن حب للوطن
ربنا يحفظكم
حمدالله على السلامة يا فرج
الحمد لله يا ادهم الحمد لله ، حمد الله على سلامتك (واحتضنه)
هنا هبطت الطائرة أرض مطار القاهرة
نزل فرج وادهم والضابط وعند رؤية أرض المطار ، سجد الشابان يقبلان أرض الوطن
ماكنتش مصدق إنى هايجى يوم واسجد وابوس أرض مصر
بوس أرضها يا فرج زى بتوع الأفلام
مش افلام هى فعلا وحشتنا ، مصر عاملة زى الوردة فى قلب كل مصرى ، و مستحيل حد يقطف الورده دى من قلبنا
مش نسرع بقى علشان نخلص الإجراءات وتروحوا لاهاليكم
تمام يا افندم
وهنا ركبوا سيارة كانت تنتظرهم ، وانطلقت بهم

_ فى مكالمة تليفونية بين اللواء عاطف والضابط حسام
مش عارفين نودى جمايلك فين يا عاطف باشا
لا جمايل ولا حاجه يا حسام انت ابنى وده دورنا ، ودول ولادنا وليهم حق على مصر، ومصر مش بتنسى ولادها
تمام يا باشا وأن شاء نتقابل على خير وليك هديه قريب
ماشى يا حسام منتظر
قريب ان شاء الله
تمام اوعى تنسى تعزمنى على فرحك
هو الفرح يبقى فرج من غير تشريف جنابك
ربنا يوفقك يا حسام سلام
سلام يا عاطف باشا(أغلق حسام الخط وتنفس الصعداء)
ها مش هاتعترفى يا رسمية ،التهم ثابته عليكى
تهم ايه يا باشا انا فى السليم
تمام(يريها صورة) دى صورة اتصورت بالصدفة وانت داخله أوضة الصيدلية وعليها التاريخ(تندهش) ودى بصماتك على الدولاب ، وكمان شهادة زميلتك« اعتماد» عليكى أنها شافتك و صورتك كمان مش وانتى بتسرقى لاء وانتى بتشيلى الأجهزة عن أيمن لحد مامات
ولما اعتماد شافتنى ماحاشتنيش ليه
علشان خايفه منك ومن جوزك إللى كان بيراقب ومستنيكى
جوزى انا مش متجوزه
تمام (صائحا) شاويش حنفى دخل جوزها عباس عبيد الصاوى الشهير بعباس الجن
تمام يا باشا
(يدخل عباس فى حالة مزرية على وجهه وجسمه إثر الضرب و البكاء الشديد)
وعندما رأته
عباس!!!!! مالك ياعباس
الله ماانتي طلعتي عرفاه اهه(اكملت رسمية ولم تلتفت الضابط حسام)
ربنا يمهل ولا يهمل يارسمية ،فريد واصل قتل ابننا
ايه(صارخة) ابنى مات ياعباس ابننا الحيلة مات ياعباس
شغله من ورايا فى الصنف الواد حب يستنصح قتله
وهاتسيبه ياعباس
اسيبه ازاي، والله لاقلب عاليها وطيها (ينظر للضابط حسام ويعطيه الفلاشة) الفلاشيه دى يا باشا عليها كل بلاوى فريد واصل من قتل وتجارة الصنف وتجارة آثار وتجارة أعضاء وكمان اسماء شركاءه واسماء المافيا إللى بره
ودى عملتها ازاى ياجن
كل بلوه كنت باسجلها صوت وصورة ، وكمان اللاب بتاعه وقع تحت ايدى مرة ، اخدت كل إللى عليه ، كنت حاسس انى فى يوم هارجع للفلاشة ، وأهو جه اليوم ده يا باشا
ها هاتعترفى يارسميه (بغل شديد)
طبعا يا باشا علشان اشفى غليلى من فريد واصل (اعترفت رسمية بالسرقة ونقل الأخبار لفريد وقتل أيمن بتحريض من فريد وجرائم أخرى وكذلك اعترف عباس بوضع البودرة فى منزل قاسم وسعيدة وخطف قاسم وخطف فرج وإرساله إلى قبرص وتزوير عقد أرض سعيدة مع موظف السجل المدنى، و مشاركته لفريد فى كل جرائمه (انهمرت الاعترافات من عباس رسمية وسجلت أقوالهما )
خد دول على الحجز وجهز قوة للقبض على فريد واصل
فريد زمانه وصل المطار يا باشا ، لما كشفته خلا الرجالة ضربوني وطلب منهم يموتونى لكن هربت منهم (اصطحب الشاويش حنفى عباس رسمية للحجز )
فتح حسام الموبايل واتصل
عاطف باشا الهدية عندك فى المطار استلم الطرد إللى وعدتك بيه
معقول بالسهولة دى
وكمان فلاشة، عليها كل بلاوى فريد واصل هابعتهالك حالا
دى هدية هايلة يا حسام
مايجيش من بعد خيرك يا عاطف باشا
تمام سلام دلوقتي علشان ألحق اعمل كل الاجراءات
سلام ياباشا
(ارسل الضابط حسام لقاسم وسعيدة لأخذ أقوالهما وتم عرضهم على النيابة التى أفرجت عنهم لعدم ثبوت الأدلة واستنادا لاعترافات عباس و رسمية )

_ف المساء وأثناء جلوس عائلة قاسم والحاج عبد الرحمن وصلت سيارة الشرطة ونزل منها الضابط حسام ودخل البيت فوجد هذا الجمع
والحاج عبد الرحمن يحدث الجميع
إذا كان وجود الشوك في الورد بيخلينا نحزن ونزعل فوجود الورد في الشوك لازم يفرحنا
تمام ياجدى
الشيخ الغزالي قال ايه
قول ياجدى ......قال ايه؟
ﺗﻘﺪﻡ ﺷﺎﺏ ﻓﻘﻴﺮ ﻟﺨﻄﺒﺔ ﻓﺘﺎﺓ.. ﻓﻠﻢ ﻳﻮﺍﻓﻘﻮﺍ عليه!.. ﺛﻢ ﺗﻘﺪﻡ ﺷﺎﺏ ﻏﻨﻲّ ﻭلكنه ﻓﺎﺳﻖ فواﻓﻘﻮﺍ.. ﻭﻗﺎﻟﻮﺍ ﺳﻴﮭديه ﺍلله!!!.. ﻟِﻤّﺎﺫﺍ ﻟﻢ ﻳﻘﻮﻟﻮﺍ ﻋﻦ الأﻭﻝ ﺳَﻴﺮﺯقه ﺍلله.. ﺃﻟﻴﺲ ﺍﻟﮭﺎﺩﻱّ هو نفس الرازق
الله يا حاج عبد الرحمن قول تانى
ماشى ياقاسم
سئلوا شيخ الإسلام ابن تيمية إللى أخونا البعده ظلموه معاهم : أيهما أنفع للعبد؟ التسبيح أم الاستغفار؟ فقال : إذا كان الثوب نقياً فالبخور وماء الورد أنفع له ، وإذا كان دنساً فالصابون والماء الحار أنفع له. فالتسبيح بخور الأصفياء و الاستغفار صابون العصاة
الله عليك ياجدى من زمان ماسمعناش الكلام الحلو ده
ان شاء الله نتلم كتير ونقول ويحلو الكلام
يدخل حسام فى هذه اللحظة
يعنى ماحدش قال تعال يا حسام اتعشى معانا
هو انا مش منكم ولا ايه....
مش منا ازاى ،ده كلام برضه، ده أنت غالى عندنا
والله ياحاج عبد الرحمن كلامك بيريح قلبى
يعنى معقول بعد كل إللى انت عملته ده وننكر جمايلك
عيب عليكي يا حاجة سعيدة تقولى جمايل
حاجه ، من بقك لباب السماء
والله لتحجى انت والحاج قاسم علشان يبقى اسم على مسمى
حجتنا يابنى لما نستر بناتنا ،وفعلا جمايلك مغرقانا يا حسام يابنى
جمايل ايه مافيش بين الأهل جمايل واللى عملته ده واجب عليا سواء واجبى فى شغلى أو واجبى ناحية أهل مراتى
لسه بدرى يا حسام حكاية مراتك دي ، أولا الجواز بعد التخرج
(يقاطع حسام ويكمل كلام رضا)والخطوبة بعد مايرجع ابوكى الحاج قاسم و اهو رجع
(نظرت رضا لحسام بتحد جميل) وقولت لما يرجع فرج
يا سلام جيتى فى جمل تعال يا فرج
يا سلام بتتريق تعال يافرج يجى فرج
انا جيت يارضا (نظر الجميع لمصدر الصوت فقد كان حسام يقف أمام الباب وخرج فرج من خلفه فى لقطة كأنها أخرجت بطريقة السينما فخرجت صرخات من البنات وصيحات من الأولاد واغرورقت عيونهم بالدموع وخصوصا سعيدة ورضا وقاسم الذى قفز واحتضن ابنه فرج وارتفعت يد الحاج عبد الرحمن لتشكر الله عز وجل على عودة فرج سالما
اللهم لك الحمد والشكر على رد الغائب وإبعاد النوائب
اللهم إنا نسألك الفرحة الدائمة وحسن الخاتمة
اللهم ارزقنا توبةً نصوحة قبل الموت
اللهم يا مقلب القلوب ثبت قلوبنا على دينك
وأبعد عنا كل كرب وهم
وسعوا شوية عايزة ألمسه بأيديه أملّى عينى منه، حضنه وحشني (وأخذت سعيدة فرج فى حضنها وظلت تبكى وتضحك وتشكر الله على عودته بينما أخذته رضا فى حضنها
ياه يا فرج وحشني قوى قوى يا اخويا (وأخذته فى حضنها وهنا انطلقت زغرودة بشرى لتعلن للكفر عن عودة فرج )
يا بختك يا فرج الكل حضنك وباسك إلا ماحد حتى سلم عليا بالايد اوبضحكة من بعيد
وهنا اتجهت رضا إلى الحاج عبد الرحمن وأبوها وأمها وجمعتهم
الراجل ده انا أعلنت عليه حبى، وبكرة ان شاء الله لازم اتخطب له رسمى(بلهجة جادة ) ، راجل بجد زى أبويا قاسم يستاهل الحب،(بنبرة حنونه) ، وانا قلبى دليلى وقلبى قاللى كده و علشان قلبك يبقى دليلك لازم عقلك يبقى معاه. وانا باحبه بقلبى وعقلي .
ايه إللى بتقوليه ده يارضا انت اتجننتى ،فين كسوف البنات فين عاداتنا وتقاليدنا هى البنت هى إللى بتطلب
ولا يهمك ياصابرين جدى عبد الرحمن عمى قاسم امى سعيدة(اهتز قلب سعيدة لهذه الكلمة)
انا يشرفنى ويسعدنى أنا واهلى إنى اطلب ايد بنتكم رضا وباحبها وإن شاء الله هاشيلها جوه عينى
واحنا (تقاطع صابرين أبوها)
واحنا ايه يا ابا ، فين اهله مش دى الأصول
يا سلام كده ( فتح حسام التليفون واتصل وفتح مكبر الصوت )
أيوه يا حسن هات عمك محسن واختك ريهام وتعالوا عند بيت نسايبى علشان نخطب رضا رسمى
تمام حالا ياحسام
ماتتأخروش
مسافة السكة سلام (أغلق التليفون)
ها فيه حد عايز حاجة تانية، لو أبويا وامى عايشين كانوا أول ناس هايبقوا هنا (ربتت سعيدة بحنان الأم على كتفه) وفى الفرح عيلة الشماس كلها هاتبقى فى الفرح موجوده كلها من كبيرها لصغيرها
دقائق ودخل عم حسام وأخيه وأخته
انتوا لحقتوا تيجوا
احنا جاهزين من بدرى احنا كنا بس مستنين تليفون حسام فين العروسة يا حسام
بص كده ياعمى طلعها من القمرات دول
اتجه العم محسن نحوهن فخرجت ( هنيه )طبعا مش انا مع إنى اجملهم بس الظابط حسام كبير عليا شويه عشان كده هاتنازل بروح رياضيه عنه لاختى رضا وربنا يرزق بعد كده
ماشاء الله كلهم احلى واجمل من بعض بس هى دى رضا( وأمسك يد رضا ) بعد اذنكم(نظر للجد والأب والام ) يشرف عيلة الشماس انك تكون واحدة مننا يا بنتى انت بنت اصول واحنا بنحب ولاد الأصول
وهنا زغردت بشرى بكل عزم لديها ونزلت دموعها على خديها وهنأ الجميع الجميع
وهنا دخل الضابط سامح
تمام يا حسام باشا
فيه حاجه جديدة يا سامح بيه
طبعا فيه حاجه ونص مش انا دراعك اليمين
طبعا مافيش كلام
وصحبك المخلص
لخص فيه ايه
طيب انت هاتخطب وتتجوز انا هاعمل ايه؟؟
هو ايه ها تعمل ايه؟؟؟ (فهم قصده )آه دور على بنت الحلال واحنا كلنا نخطبهالك
وأدور ليه ماهى بنت الحلال هنا انا عايز بس الموافقة (نظر إليهم) حاج عبد الرحمن عمى قاسم امى سعيدة، انا يشرفنى ويشرف عيلتى انا أتقدم واخطب ايد الانسة صابرين(عقدت المفاجأة لسان الجميع فنظر سامح لهم قائلا) أفهم من سكاتكم إنى مرفوض
لاء يا بنى بس نشور البنت ده شرع ربنا
ايه رأيك ياصابرين(نظرت صابرين إليهم ثم ابتسمت وتوارت خجلا فقالت بشرى)
ايه يا جماعة السكوت علامة الرضا بصتها جاوبت وقالت موافقة عايزين ايه تاني
خلاص مبارك يا سامح يابنى
على العموم امى وأبويا واخواتي هايبقوا فى الخطوبة بكرة (احتضنت رضا صابرين مهنئة لها وكذلك سعاد ثم احتضنتها سعيدة )
مبروك ياصابرين
الحمد لله الحمد لله أشكرك يارب عمرك ماخزلتنى ، لمتنا تانى وفرحتنا ، .ان شاء الله نعمل مشروعنا نطلع خير ونساعد بعض، نجمل الدنيا بشغلنا ولمتنا مع بعض ....
لو كل واحد عمل إللى عليه بكل حب وتفاهم
علشان يخلى الحته إللى هو فيها جميلة ، الأرض كلها هاتبقى جنة لكل الناس
وعمرك ما تكون قمر منور ، ألا اذا كان حواليك ضلمة كتير، كل نور بيطلع من الضلمة
العقل ابو القلب والقلب ابن بيتعب أبوه فلازم الأب يأدب ابنه علشان مايضيعش.....
الله عليكى يا سعيدة ايه الحكمة دى
ابتسمت سعيدةو قامت وأتت بمشنتها وهى تحملها وهى ممتلئة بالعنب قائلة للجميع
الحمد لله يارب ، مدوا أيديكم فى مشنة سعيدة وكلوا عنب .... سموا بسم الله....
النهاية

كلمتي....
عشت معكم خلال هذه الرواية أوقاتها جميلة وسعيدة واتمنى أن اكون قد وفقت في عرض روايتي، اعدكم إن شاء الله بالمزيد من الأعمال الروائية التي ترضيكم وتنال إعجابكم ، لقد اسعدني متابعتكم وتعليقاتكم التي اشعرتني بقيمة ما اكتبه..

إلى اللقاء في الجزء الثاني من مشنة سعيدة.