بين السطور وسط الكلام ..... للشاعر عاطف محمد
بين السطور
وسط الكلام
عشت مسجون الإرادة
عشت مكبوت السعادة
جوه الجحور....
أمتى تنفينى السطور؟
أمتى اتحرر بذاتى؟
أمتى ابقى
بره حد الأبجدية؟
ألقى .....انوار الحرية
بره أوطان الكلام
ألقى الكيان
إللى عاند
وابقى حر
كل أقلام الكتابة
اتلونت نور الصباح
جوايا جت و اتحررت
اتنصلت من القيود
من كل أسواق العهود
قتلت النخاس وجت
عدت خطوط حد الأنا
بلا نرجسية بلا..... بلا
ندهت ذاتى
وقالت يلا
خرجت ذاتى
من كتاباتى
فجأة لقيتني
حر حياتى
والحرية ملك ايديه
أيوه أنا حر
حتى من كوابيس
حكاياتى
من كل مداين افكارى
واتهد موانع اسوارى
ومشيت حر
ف كل شوارع
ارسم ف زهور الأحلام
وارويها من نبع سلام
انده على شوق الأيام
أصرخ وأصرخ
يلا تعالوا...
ولا يمنعنى أى كلام
حريتى وصلت بسلام
أجرى واخدها
بين أحضاني
قعدتها
وف وسط الشارع
اقرأ ليها كل اشعارى
بس لقيت مشكلة
مش هى
كل قوافى الشعر
اتحدت
ايوه اتحدت بنت الأيه
عندها زاد
عن كل حدود
مش معقول
ده أنا دايما أجود
حتى رياح التوهه
اتعصفت
نطرت جسمى
ويا مشاعري
وأنا باتمزع كلى آهات
جوه هضاب الأمنيات
بين حكاويا والاشاعات
صرت قصيدة
مره لمجد ومره لشكر
حزن رثاء
أو صوت لدعاء
أحيانا بلقانى هجاء
نص تواضع وكبرياء
انحصرت مابين قرارى
واتحاصرت ف سطر تانى
بين قوسين (حر وسجين)
الشعار إللى ف كلامى
فر منى وقال سلام
واختفى بين العلام
حس أنه حد فاصل
مش هايوصل أو يواصل
إلا لما ابقى حر
فجأه ضاع منى الكلام
قولت أدور ف السطور
يمكن ألقى ضى نور
ألتقيت مليون شعار
كلها مليانه نار
لما شمتها لقيتها
ليها ريحة ألف طين
نسل نسل الكدابين
كدبها روح الشعار
إللى ساكن ليل نهار
صدقها مسجون جهار
صدق مسلوب الديار
ومعلقينه فى أعلى سارى
دم بيغطى الأراضى
دمه سارى ع الحيطان
والحيطان ليها ودان
سامعه خبث بصوت جبان
كان ف يوم واكل معانا
عيش وملح خساره فيه
المصالح بتناديه
بيع ياواشى
بيع يانخاس الكلام
بص محتاج الملام
حتى ده خسارة فيك
بصيت لقتنى
صدق ماشى
مشنوق...... وباتفرج عليا
انا الحر
إللى دوخنى الهنام
واتقتل عند الجميع
إللى باعوا نهار ربيع
باعوا ثورة وقالوا يومها
انقلاب
هو ده فكر
الهباب
انا الحر إللى قال
مصر السلام
واتدبح من غير كلام
كل ده اكمنى صادق
فوق منابر للمجون
اخرسونى وكممونى
واتهمت بالجنون
قالوا مجنون الكلام
بهدلونى ومرمطونى
بس وف وسط المهابرة
والمناهده
القناع الزيف ده طار
من وشوش
حضرت وشاهده
رحت راسم
لوحة شاهده
للحدادى والتعالب
كل غربان المقالب
كل خيالات المأته
كل أنواع التباته
والغتاته بلون غميقة
فجأة أمطار الحقيقة
نزلت ميه بريئه
اتمحى وش البراءة
إللى كان مرسوم عليهم
ضاعت وساحت ألوناته
كشفت.... غباوته وحكاياته
واتفتح للفجر طاقة
وابتديت اكتب قصيدة
م البداية بدون رياء.
مش هامجد حد تانى
لجل يرضى ويكافئنى
طظ فى كل العطايا
هابقى حر للنهاية
نفسى قالت قول بجد
قبل كده مجدت حد
قولت لاء وألف لاء
بس مجدت الوطن
وإللى خايف يوم عليه
وإللى حطه بين عنيه
أنا الخريف إللى ابتدى
لجل ما يكدب كلامهم
يسقط ورق أشجار
غباءهم
مايهمنيش خلاص
خداعهم
انا إللى خدنى المجد حضن
انا إللى مولود ف الدفاتر
والكتب .....
انا فيها حر
من نسل حر
مانيش دجال
أنا فارس
ولا اتولدت
ضل و خيال
انا حارس
خلوا بالكم
من لصوص كل الزمان
إلى عايزين يسرقوا
منا الأمان
قمت ألملم ناس بلدنا
قمت طالع كل مدنا
قولت حى على الفلاح
ألتقيت بحر الجموع
جمعتنا جملة واحدة
مصر فوق كل البشر
ألتقيت ف الوحدة
نفسى
طلعت شموس
كل الأمل
كل أوقات العمل
يلا بينا
نبنى لينا سطور جديدة
سطور عنيده
أبجدية بحرفنا
مافيهاش لاخوف ولا انا
ولا شطط ولا عكننه
ولا فساد ولا عناد
اهم حاجة
كل واحد
فينا حر.....
حرية نابعة
م الوطن
للوطن
